30歲前想做而未做的10件事

好facebook quiz feel...

1.去一次歐洲旅行
2.談一次長久的戀愛
3.買車買樓
4.結婚生仔
5.與先父好好傾一次計
6.出張黑咭
7.大專/大學畢業
8.入九鐵做馬鐵及沙中線營運部
9.二人旅行
10.到40,50,60,70,甚至以後年歲都可以同佢一齊

高清睇頒獎禮

自從家中換了那部LCD芒後,那個"借回來"的高清解碼盒
終於有job俾佢做.預錄過幾次都係失敗而回,今次終於
成功預錄首個高清節目--十大勁歌

老實講,唔係要mon住個機頂盒運作(次要),同埋無波睇
兼無friend出街食飯(主要),都唔會係屋企睇佢(睇叱吒可
以去完現場仲要屋企睇重播,真係)

睇左成晚,頒獎禮其實可以好好睇,如果志偉哥同崔建邦
無咁多爛gag,如果每個歌手出場前有個FM導住,唔使等
關心妍奇怪地自己走去囉獎,如果方大同係囉國語歌金獎,
如果今年女歌手獎宣佈取消,乜人都唔頒,總好過頒完又話
爆冷造馬(雖則記錄係人創,打唔打破都唔代表成就有幾高)

用機頂盒錄節目,個file大到得人驚,入電腦搞搞足兩日都仲
未搞掂,雖然而家可以好順暢地播放條片,但點去剪輯條片,
點樣合併檔案(因為節目長度超過2G就會自動cut,例如你錄
60分鐘節目,就會見到2個file),到呢分鐘為止都搞唔掂

睇怕又要上網搵各大英雄幫手

酒醉過後收執殘局

做人有時幾矛盾,一方面成日唔想諗得太多,
於是借酒澆愁,但同時間又怕酒醉過後如何自處,
識嘔都還好,最怕唔識嘔,不斷大叫"我無醉",於是
不斷飲,輕則打爛野,重則打傷人搞出事

某一年自己上司結婚,宴席間自己同事不斷叫我飲
紅酒,結果當然只係識同人講"我無醉",要兩個同事
合力送我返屋企

呢幾日自己有如飲醉酒的司機一樣,開車不斷撞傷人,
而家傷者甚多,至於與某人關係...作為一個醉酒鬧事
司機,被人釘牌罰錢甚至坐監都係預期之內,只望法官
點判,但心中有數,當你一腳一腳油車人心口,唔通人家
當無事發生

PS:今時今日已經唔再飲酒,一來怕醉,二來身體唔太好
,飲酒太傷身

常想一二

有時覺得返學讀書教既唔單係課本知識,而係人生道理

今日上課(教儒家,特別耶)舉了一個例子,就是張忠謀的
常想一二,不思八九,事事如意,人生不如意事十常八九,
如果只係不斷花時間去想唔開心既事,只會令個人越來
越謝,提早衰老

經濟環境急速轉差,雖然大家心理與錢包上都感到錢財
盡失,但今天你還在世,有生財能力,經濟總會回復原狀,
君不見早十年前亞洲金融風暴加SARS,大家都是這樣
過日子,當大家身經百戰後,今次海嘯之後回頭一望,不
值一提,最多大家只會慨嘆當年為何無買匯豐,點解唔
買番三五七個單位等升值

一場海嘯帶來了不少反思空間,除了如何監管金融機構,
或者經濟將會如何轉變外,更令人開始意識搵錢並不是
最重要,心靈滿足開始更為重要.特別當大家發覺原本一
個國家可以破產,一間公司可以蝕超過百多億,全球用了
十多萬億元資金去救經濟,一時間發覺人類被數字玩到
頭都大,到回到起碼大家只為一些數字不斷追求物質上
既開心,但這只是表面風光,經不起風浪沖擊

要令心靈滿足,首要條件乃放下自我,然後才能找尋自我
最喜愛的事和人,你,今天找到了嗎?

馬交個朋友

以前過澳門可謂大件事,雖距離香港只是一小時船程,但點都要
book定酒店房住番一晚,以前租一晚市中心房只不過二百多元,
同Ringo肥權玩足5 day都係千元內既事

今時今日澳門賭場多,船公司由兩間變三間,遲d仲有間千人
大船過大海,搞到免費船票日日有,只要肯俾心機排下隊,不論
你要鉅記手信,定係葡式美食統統可以試到,數數手指今年去
澳門次數,已經係以前去咁多次既總和

自賭權開放,自由行拓大內地客源後,澳門可謂一時間被吹脹,
街上多左旅客,賭場多過桑拿浴室,就連酒店同名店一下子十
級而上,但自收緊簽證,加埋經濟轉差,澳門又再次打回原型,雖
然而家去大賭場仍然人山人海(生意淡江大學不如賭博),但去
其他地方,都感到澳門又再次少人

澳門可愛之處係靜中帶旺,亂中有序,正如係新馬路交通好亂,
但點都有辦法搭到巴士截到的士.不過今時今日要好平食一餐
已經無晒,但好食既繼續保留,只不過變得公式化同機器化

唔知幾時又過澳門?

派彩...作實

我們朋友之間近年流行玩個小盤口,預測那位會最先宣佈結婚,
當中以何氏和陳氏較多朋友支持,亦被視為熱門分子.到了近期,
陳氏在其面書中暗示將於下年結婚,大家最初只是估估下,直至
陳氏身邊好友證實才確認有關消息

結婚當然不是賭博,上述盤口只是大家無聊時想出來的小遊戲,
請不要向開盤口人仕取回派彩(無受注何來有派彩).一對男女由
結識相愛以至談婚論嫁各有不同時間長短,但大家當願意結成
夫婦後,要學懂放下,包容和相處,同時亦要開始為對方著相,因為
往後日子家中將會有一名(甚至更多)全新成員在你家內走動,你
以前喜愛沖涼後只著條boxer無上身衫四圍走,以後請你著多條
短褲加t-shirt才好離開廁所

要將這個女主人帶進你家,先決條件乃你身上最少要數十萬元
流動資金,搞一場世紀party,話俾全世界知呢個知你從此被困.
至於回報方面,應該同買兄弟債券無乜分別,想好似班苦主要求
全數回水可能性較低,能夠有六至七成回本已經俾個叻字

雖然搞party同做苦主無分別,但唔搞仲麻煩過搞,所以如果有心
呢一兩年帶女主人回家既朋友(各位熱門冷門分子),請開始預備
足夠資金,因為任總唔會用外匯基金支持你,更加唔好望安仔兄弟
出手相助(人家打開門都要搵錢)

更新

呢個blog個blogger好懶,照計去完旅行應該大把野想講想寫,
但結果一粒字都無提過旅行之事

提起旅遊,近來不少朋友都喜歡出外旅行,秋季的確令人想外
出走走

今時今日做網友每日都寫不少文字,但寫得最多還是火星文,
一係實卜推推推,或者一個icon就代表晒所有一切

金融市場最近動盪不安,人人怕面對將來,會否衰退沒落,大家
怕投資,怕自己手上現金會被蒸發,但別忘記生存在世就點都
有經濟活動出現,只是該活動是活躍還是減速,如果怕現金消失,
倒不如早點將戶口內的錢提出,放在麵包餅干罐下好過

睇奧運

究竟係高清睇奧運,定係高清睇廣告?

今屆奧運在北京舉行,更是首個採用全高清拍攝的大型運動會,
本地電視台為此大力宣傳,投放不少資源去播放奧運

奧運舉行一星期,不少節目出現投訴,包括播放廣告,主持人內容
甚至節目安排都令觀眾感到不滿

無線作為本地最大電視廣播機構,佢做每一件事都受人注目,但
無線或許仍然忘記了今時今日人人講互動,做節目總不能因為
要計廣告,於是忽略了觀眾需要,結果就出現中國對西班牙籃球賽
只欠6.5秒就播新聞這件事

無錯,廣告商真金白銀賣下廣告時段,總希望自己廣告能傳送至
觀眾面對,電視台亦要靠廣告收入才可播放各類節目,但當電視
台要cut節目去播廣告,結果那個廣告又成為被圍攻和發洩對象,
達唔到預期效果,又令電視台影像受損,就算再講三百萬次"我地
就係奧運"都無法改變觀眾印象

不過,無線作為本地一哥,慣性收視下播雪花都有7點收視,更何況
係講爛gag cut節目,睇怕大家想聽根清淨,一係mute個電視機,
轉睇亞視或有線網上直播,再唔係實身飛去北京慢慢睇,但而家可
以買到飛入場機會係... ...

8號風球下

正當人人諗住8號風球下排隊囉中六學位,或者搵足4隻腳
打麻雀,我家就進行大裝修,先換晒全屋電線,繼而換新床,
最後就油牆換地板,3天假期就俾晒成間屋(yeah!)

8月8日,奧運開始,你ready好未?

食飯

食,作為日常生活必需要做既事之一,有人選擇是旦無
所謂,有人選擇要食得好,有人選擇食環境味道等等等,
總之人人對食總會有要求,只是大家將目標放在那個
位置上

食對於本人從不講究,一來食幾多最終都係廁所內
解決晒,二來身邊朋友對食要求可謂南轅北轍,有的
只求地方吹水聯誼,食甚麼沒有要求,填肚便算;有的對
食有要求之餘但希望可以有聚會,地點食物都要細心
思考;當然有的就真係考牌,食有要求亦講求環境質素,
每每與這些人食飯總要想清想楚,不可有任何地方犯錯

作為男性,與女性食飯可以講是一套學問,由朋友相熟
朋友男女朋友同事鄰居以至家庭成員,食甚麼點安排
都足夠寫本書,正如你不會請女友打邊爐,更不會請
媽媽去食魚生.

所以,呢期見我成日上網睇openrice,唔係因為要去睇
食邊間,而係睇點解咁多人可以食到寫食經,更好野係
點樣將食物變文字