聖誕雜想

聖誕樹下許個願 心想事成

過多十日大家應該過緊平安夜,你今年打算去邊?食大餐,定係去老蘭

唔同人有唔同玩法,我年年都唔知自己點樣過,食大餐又唔係,陪朋友
班friend都係自己玩,結果有人直頭係屋企訓...

中學時代我o地成班同學最鍾意去同學屋企傾計傾通宵,今年就約埋
25號去BBQ

今年你預計會收到甚麼的聖誕禮物?電話,相機,定MP3機,對我o黎講
除o左健康外就係大家都咁開心

呢期公司又要日日開夜,為了一月可以出到本書,希望大家唔好見諒!
不過聖誕幾日都有假放,放心,想約我任何時間都方便

PS:日本,幾時可以去到?

對不起

對不起,玩blog按理要日日更新,但我做不到,因為
成個11月日日開夜,加上家中有事,所以要等到今
天先再提起勁寫呢個blog

11月都唔知發生乜事,先要日日開夜,開到自己唔知
返緊乜工,接著家父入院,而家想探佢怕自己流感未
好,搞到佢發燒就大件事,因為父親要做化療,抵抗力
好差,一個發燒肺炎好易變大病

屋企人要日日去醫院,母親又要返工囉湯囉飯,佢每
天5點多就起身,做到晚上12點先上床,我真係怕佢太
辛苦

各位,我要同大家講句sorry,呢期心情唔太好,如果有
任何得罪既,先講句唔好意思,亦希望家父早日康復,
請神賜給他力量和勇氣,去戰勝病魔,阿門

介子

一個小小的鐵圈,所包含既意思可以好多, 又或者只是平水相蓬,為了靚於是帶上手指

一個小小的鐵圈,你十隻手指加埋有幾多隻?

一個小小的鐵圈對你來說意義不大,因為只是平價貨色,但對我來說它是一個歷史,雖然是一個不愉快的歷史,但總算人生的第一次,多多少少值得留念

一個小小的鐵圈,你將它存放在那裡?夾萬,電腦機底,定還是已變成將軍澳堆填區的一部分

希望借這小小的鐵圈你會記得那一天...

請救我!

神呀,我只是一個普通平凡人,要求不多,
無女朋友都不緊要,最重要係一家人平平
安安,身體健康,最埋能夠賺錢養家

感謝神,阿門!

生日快樂2

成日都有人生日,又有朋友生日了,不過唔知佢收唔收到份禮物,
話唔定佢o地兩人世界中,唔得閒理有無禮物出現

講完廢話,返回現實,公司呢期人人唔多出聲,因為太多人感冒了,
天氣變人都變,小心身體,各位珍惜現在,同埋小心!要用腦

演唱會

演唱會呢期睇唔少,林狗加草蜢上星期先睇完,今週就輪到容祖兒

講真容小姐開咁多concert基本上都睇過晒,如果講最好睇暫時係第
一次紅館開個場,可能夠raw,唔太花巧,而家太多跳舞,連<未知>都要
加西斑牙調子一路跳一路去唱,可見自kelly唔再唱快歌後有不少女歌
手都想做舞林歌手

自己覺得呢次演唱會太過著重跳舞,結果忽視o左容小姐最叻既唱慢歌,
結果每個opening都係勁歌熱舞一番,連encore都係,結果令觀眾難消化
同投入,講真入得場都想聽下佢唱歌唱成點,但結果係場場係咁跳,唔知
以為睇緊草蜢加郭富城演唱會

另外有o的地方其實可以改善,例如首段間場播片,話阿Sa阿Gill要賣走
容祖兒,於是容小姐一出場係著裙卦,但轉個頭就變成埃及妖后look,再
跟手就話要搵男朋友,但最終結果賣唔賣得成個女根本無答過

整體我俾75分,不過rundown可以再執,有o的歌根本唔扣題,同埋真係唔
好再唱<未知>,開4次4次都唱,你唔記得班fans實記得

PS:算la,呢次反正有人贊助,點講都唔係真金白銀買票睇,講幾多都無用

給沉小姐的信(二)

首先大家唔使估邊個係沉小姐,現實中係無呢個人,都係一句,如有類同,實屬巧合

沉小姐,

你好

每次開場白都係"你好"其實係有點悶,或者你唔覺得悶,因為人人每日第一句都
係講"你好",講得多自然習慣了

早幾天朋友來電,說自己家中近來出了少許問題,朋友希望找多幾份兼職工作,賺
多少許金錢去解決問題,從是我硬著頭皮找兼職幫幫他.聽說沉小姐公司近來業務
蒸蒸日上,未知可否幫這位朋友安排一份兼職工作,就算做掃地洗廁所都無所謂,最
重要係有錢賺

沉小姐,你是否喜歡配帶銀器?近來聽朋友說美國訂T字頭波波頸鏈只需二百美元,
就算寄來香港都只需$1500左右,你會否訂購一條嗎?

今天就在此收筆,不知郵差先生有沒有將這封信送到你手上?或者你根本毫不在意

你的朋友,
王馬上

PS:你份保單如沒有任何特別要求,將於不日內取消,到時需賠償一切損失,包括金錢
同精神上

給沉小姐的信

沉小姐,

你好

近月不見,身體是否仲頂得住,呢期禽流感咁勁,作為禽獸類動物之一既我
呢期都係避一避,免得將身上既悶氣,同埋懶氣送俾你,或者下次見面前應
該帶上口罩

自上次一別後,知你工作繁忙,忙既都是扮鬼,同埋都係扮鬼,扮鬼扮得多應
該無興趣睇《怪物》,因為林嘉欣點扮點睇都唔似黃夏蕙,最多咪似莫文尉.
不過你對我同見到夏蕙姐姐一樣,都係點下頭,問候兩句,然後無言以對.但
你會同夏蕙影合照,仲晒成12R咁大張,而我,莫講12R,連一張似樣既合照
都無,有既都應該係過期幾十年既單人數碼相幾張(聽說用來影你個部相
機早已退役了)

你手上那部P910i好用嗎?聽說那部MP3機早已變成展品,放在公司某處供
遊人欣賞中,如果可以既不妨送贈俾利女仕基金會,或者沉二妹服務處,她們
非常樂意地將MP3機還原成電子零件和膠殼機身.

公司老闆身體好嗎?工作繁重嗎?明白黑玫瑰一來帶點邪氣,二來送禮為何
不直接送給她人之手,但希望老闆們能準時出糧之餘,亦給點假期打發員工,
鼓勵她多點消費,好過叫個員工日日返公司坐,坐到pat pat大之餘搞到變電
車女就無謂

沉小姐,作為你朋友之一非常明白工作繁忙程度,但請你不要一邊傾計一邊
掛著工作中,真的不知你那一句是命令你下屬工作,那一句是和我傾談你的
人生哲理,和早在7個月前已訂購了林憶蓮演唱會票,仲打算和你老闆"拍住
拖"咁去睇

你的朋友,
王馬上

PS:約個時間傾下你份人壽保險問題,因為你份保單係仲想簽供落去,定係
一早已經取消,請通知一聲,否則作為經紀既我就只好cut你單,免得俾公司
知,送碟尤魚我食

PS2:沉小姐內容全屬虛構,如果講中晒或覺得我鬧緊你,我只好送句Sorry,
同埋送番句最老土說話:如有類同,實屬巧合

朋友三件事

有時都想寫下一些關於自己和身邊朋大所發生的事,不過
唔知點解仲係寫唔出,就算寫得出總係令當事人睇完唔多
開心,或者有o的事收收埋埋總好過開門見山

好耐無試過8點前返到屋企,一開電腦收到個外國朋友既icq
message,傾下傾下收到一張相,原來係這位朋友新相識的一
位男姓朋友(老外!),佢初時話係新仔,跟手又話其實係朋友,
問我對佢有乜意見,講真我單從一張相好難知你發生過甚麼
事,如何認識他,他的為人係點,單睇外型唔代表佢個人係點

我家有一個規定,就是除非有緊急事,否則晚上12點後不希望
有任何來電,以免家中各人訓覺.家父和二哥對此類非緊急來
電絕不容忍兼客氣,每有這種來電定必給來電者和接聽的送上
深切的"問候",朋友,你有事找我可以send個message,或者明早
再打來,我來者不拒

有位朋友本來想約佢睇演唱會,點知佢一早訂好飛,仲已經約o左
另一位去睇,呢次唔知好彩定唔好彩,因為我都仲未買飛,請問邊
度仲有xxx演唱會飛半張?

講完朋友三件事,我相信這三位當事人應該唔會理我十日,不過
你black list我又好,唔理我又好,希望你仲當我係你朋友,男性朋
友,同埋(曾經或現在)追緊你既朋友

PS:有無part time job介紹俾我,等錢使,正所謂做鴨唔夠人大支,
賣笑無林狗咁好笑,賣唱無草蜢又唱又跳,好心早早幫下我,唔該!

工作

呢期晚晚有野做,結果無時間去處理自己私人事,
忙到連相機無咭都唔知

有時覺得工作多按理回報應該都有番咁上下,但結
果係日日忙,賺錢唔多之餘,有時仲得閒到可以上網

係呢間公司做左幾年,話長唔長,成日話轉工,但轉來
轉去都諗多過做,真係睇人轉就多,自己就...

天氣開始涼,小心身體,公司開始有人傷風中(包括我)

新加坡

▲新加坡高樓大廈不多,不過近年都開始起越來越高既樓房

終於有時間去寫呢個tour,不過如果要由頭講一次,我怕講十日
都未必講得晒

新加坡其實係好住,但香港人應該唔會岩長住,因為香港人要講
去夜蒲,亂過馬路,夜訓下午起身,新加坡一個無乜夜生活,過o左
凌晨7仔未必俾你買,買包煙仔仲貴過香港買,呢個國家除非你想
收心養性,否則去其他國家如泰國應該岩你去

今次旅行四日三晚,每日早出晚歸,自由活動可以講欠奉,一返到
酒店房沖完涼第二天早上又morning call食早餐,結果全程無點
大運動過,難怪做相機鋪既朋友見到都話我肥o左

去不同車廠,來看都是大同小異,但睇真o的又有所不同.新加坡土
地編排其實係有心思,唔似香港左一楝高樓,右一座住宅,人當地
八 成人可以住千尺組屋,香港要擁有千尺屋真係發夢無咁早

今日講住咁多,下次再講!

我要飛

我要飛,飛去新加坡放假幾天,影下車,睇
下有無海南雞飯食,順手買番幾架車仔....

10月12日再同大家講下新加坡之旅

牛棚書展

身為香港人,呢兩日放假無事做,除左可以返大陸洗洗腳板,去迪士尼隨處玩外,仲可以去土瓜灣睇下一年一度牛棚書展,提升自己心靈質素

呢個書展唔單係齋sell書,而係借著閱讀去sell本地創意,sell你去關心身邊既人同事,就算你對一本本既書無興趣,都可以睇下佢o地既visual art或研討會

想知詳情,俾條link你睇,3/10就final

http://www.oneaspace.org.hk/bookfair2005/

儲物

▲又要幫便利店打工......

阿媽教落,做人點都要儲番幾個錢,將來有事都唔使咁騰
雞,不過人越大,錢就永遠儲唔到,但物質就越儲越多,有
時仲會諗點解儲咁多

身邊朋友近期日日飲藍色罐飲品,為既係儲副巴士模型

一副模型價錢貴就一般,不過話限量幾多幾多,又唔會係
市面上有得買,結果朋友們日日儲藍色鐵罐多過儲水壺

自己呢期就日日去某便利店,為既只係儲齊那個X口兔
仔掛飾,雖然套齊26隻代價應該唔止要$520,同埋儲晒
成套收個位又唔會感動,不過做人有時真係明知故犯,
超犯賤...

PS:邊個有多,幫個忙,送隻,唔使儲得咁辛苦

送禮

▲送鍊金公仔可唔可以鍊成不鬧之身?

今晚講故佬上身,特別多野想講,講下近期聽到的一單關於送禮的故事:

朋友甲某日收到一個陌生電話,一接通就聽到一名男子不斷開口鬧朋友
甲為何將那位禮物放在公司門口,因為該公司老闆返到公司時發現有這
份禮物時--一支黑色膠玫瑰花--大感不悅和撞"斜",結果就鬧成間公司既
人為何會有這事發生

初時朋友甲聽到一頭雲,甚麼黑玫瑰,又為何會打電話總他,想了一會朋友
甲終於記得這回事.原來朋友甲本想找位朋友乙有事討論兼想送份禮物
答謝,於是就致電給朋友乙,點知朋友乙電話不通,朋友甲於是就走上朋友
乙的辦公事看個究竟,誰知一上去大門已關,朋友甲見一場來訪無理由空
手以回,加上朋友甲又有事要做,於是將支由朋友甲舊同事割愛的黑色玫
瑰放在地上,看誰人會執它回家,但結果當然係鬧劇收場.

這個故事聽落有點胡鬧,不過朋友甲心裡感到不安,為何送禮會變成俾人
鬧,難度朋友甲做錯了甚麼,還是朋友甲根本不應該送禮?

針

針,有病就要打針,入大公司打工少不免要用針驗血,
有時o的朋友叫你去捐血又係要用針,做人身邊總有
唔少針放料俾你聽,阿媽織衫要用針係咁織

呢支小鐵枝唔知你見到佢有乜感覺,真心講細過打針
唔太怕,o的護士打預防針總係無感覺,打到慣.但年紀
大開始怕打針,又怕捐血支大少少size既針,因為怕捐
血期間隻自己會好緊張,於是手臂就會不停"fing",結果
會換來斷針收場

除o左捐血,更怕係去抽血做body check,唔知點解總係
覺得份report一定話自己會有乙型肝炎,AIDS兼腦炎,
所以咁多年o黎都怕做body check

究竟有無人可以幫我解決怕針的疑惑,同埋成日覺得
自己係有病既感覺

本週小總結

▲月餅與Y小姐演唱會飛,你想要邊樣?

本來今日想寫個關於電腦的事,但結果因為按錯一個掣,搞到無晒....

不如講下呢期發生過乜野事

打從公司封o左度門後,每次出入總係無以前咁方便,要行一個大圈,
不論影印,去洗手間,去飲水都係一個大圈來來回回,財運未見,但結
果行得多搞到小病多

中秋過後家中月餅同往年一樣,擺多過食,以我呢個唔食月餅既人o黎
講真係咪搞我,更何況呢期腸胃唔多掂,成日掛住要睇醫生,就連去長
洲去到度假屋第一件事就係要去洗手間...

E小姐呢期日日超忙,就算約佢食飯都無時間,唔知邊個佢先得閒聚
一聚,話晒自八月後已經無點見過

C小姐你好,身在加拿大應該不錯,13度氣溫小心著涼,Y小姐即將舉行
演唱會,不過你都唔打算回港睇,咁我仲買唔買佢演唱會飛?

林海峰唱片每每給人驚喜,如果你聽開佢做節目既話,否則你唔會明
聽三字頭背後意思

三天之旅

▲提起東堤,總係離不開炭呢個字,講真東堤
環境唔係差,不過o的度假屋裡面同外牆真係...













▲同事C小姐,攝影師W先生,同埋一個唔靚仔既
筆者


今個中秋假期你點過?來回台北一轉吃渴玩樂,定係返大陸享受皇帝式生活

剛過的三天假期,我一共去過兩次迪士尼(門口),坐過四次新渡輪,搭尾班巴
士行東涌道,睇住架港台小巴點樣車前倒後,見過迪士尼無乜遊人玩係點冷
清法,恭喜過一對新人,見到大宇同埋馬導演,同一家人食過飯,夜麻麻搭船入
長洲,坐船有如玩space mountain般上上落落,去東堤沙灘睇人玩螢光棒,點樣
4個男仔訓2張雙人床,跟手晨咁早起身買報紙食早餐,最後自己返出市區返工
扮鬼扮馬,但原來被測試者一早知你會test�
一連三天total只係訓o左8小時,相對平時其實無乜特別,不過舊同學見到我總
會問句:你做乜咁down,老o左咁多?我再囉番以前張相比較,的確唔知為乜近
期多白頭髮,連我老細都大叫一句"你做乜咁多白頭髮",睇怕我真係要搵曾江
幫幫手....

迪士尼樂與怒

迪士尼,呢期睇得最多既三個字,亦係身邊唔少朋友想/唔想去既地方

香港有迪士尼,好,總算叫多個景點

香港無迪士尼,好,總算唔使咁多爭拗

之但係有同無都好,點都要去一去玩下既,不過唔好硬要同東京巴黎
以至美國去比較,人比人比死人,與其比較不如花多o的心機去諗下點
樣玩晒所有機動遊戲同歌劇

本來呢篇文應該上星期要寫,講下自己去完迪士尼有幾好玩有幾差,但
一來我相信唔少人仲未去,二來寫話好玩又有假,寫唔好玩又好似唔多
真實,倒不如講下自己對迪士尼樂園整體有乜睇法

香港有個新樂園其實係好,始終去海洋公園去到怕(雖然間中有新野),
荔園歡樂城一早變晒住宅樓房,香港呢一代小朋友如果唔起番個迪士
尼,怕佢o地未必知真正大型機動遊戲係乜東東,可能佢o地只會識冒險
樂園,未必識有個叫米奇,有個叫米妮

香港地少係人都知,個樂園自然都係縮小再縮小,要是行晒整個樂園20
分鐘已經搞掂,不過真係去玩去欣賞晒咁多個項目花大半天都未必玩
晒

遊戲唔好玩,職員只識講童話的確你覺得係白痴既人先會做,但我覺得
入得樂園就要做一天白痴,人生有得俾你痴番日其實係平衡大家心理,
香港人唔好太緊張,relax!

剪頭髮

我唔似其他朋友有留長頭髮習慣,所以一到8,9月就要去髮型屋修一修

今日又去朋友間髮型屋,價錢都係大眾化,唯一唔同係洗頭那位哥哥似
乎真係趕收工格局,係咁洗洗洗,但又唔會點問你感受,只係公式問你個
頭痕唔痕呀,跟著就係咁洗...

跟著朋友就問我點剪,老實講我都唔知自己想點,結果講完一大輪話點
修點剪,朋友就開始落刀,不過落刀前佢每次總問我一句"你做唔做埋
color,最多我整個深啡色俾你,包你好睇"但最終係無次成功,因為明知
個頭整乜顏色都唔會好睇去邊,整落去咪仲晒時間....

結婚

人越大總會面對兩件事,一是白事,二是喜事

剛剛上星期先去完四婆的白事,參加既人唔多,只係
覺得香港做事實在太有效率,呢頭準備搭lift落樓下
去葵涌,個頭見到靈堂已經有人開始執野,預備俾下
一家人去用...呢個場面真係唔知好嬲定好笑

唔開心既事完結了,今天返到公司先見到同事I那束
神秘的生日鮮花,繼而收到女同事J既"爆炸",雖然我
早知道J小姐將會結婚,但佢老公係邊個係我未引爆
呢個炸彈之前都係唔知,好,終於用把間尺一開,看,那
個人名究竟是L先生,一位曾在本公司做了不久的一
位同事,印象唔太深,但大概知是誰人,真的估不到L先
生同J小姐已是一對,更加說到中秋當日就要結婚,於尖
沙咀某酒吧搞Party,今個中秋真係唔怕無節目...

在此恭喜一對新人白年好合,永結同心!

至於我,真係要問問個天幾時輪到我?

黑仔

你信唔信運氣這回事,或者我擒日真係黑仔都無人有一早起身跑落街搭車剛剛開出,咪去食過早餐先再搭車,等到車點知全車得我一個要企,仲要企過完隧道都無位坐

好la,諗住落車去過洗車間應該好快有車到,但結果一等再等,連自己搭來的那條路線後車都到,但自己要搭那線既車去左邊?

去到目的地一心以為天氣好就無事發生,但過雲雨一再為我降溫,想去便利店買野飲,最後都係要大排長龍

晚上去馬場食飯並玩抽獎,點知門口職員話張票收唔到, 要開多一次支票...到抽獎時間人人唔係中英國模型就係新車,但我就只係中架英國消防車,好彩架車英國有市場,否則就,哈哈

聽talk聽到一半發覺肚仔唔多掂,最後都係要去見一見醫生先可回家

講落幾好笑,但點可能全數發生係我身上,呢次真係黑仔!!

地球

愛護呢個地球,而家食乜都話出事,豬有毒有藥,魚又話
有孔雀乜乜,跟手食菜如果農藥未清,食豆腐咩?唔好意
思,原來黃豆係基因改造過,分分鐘你食既唔係黃豆豆腐,
可能係加入唔同元素既黃豆

人類進步,透過科學令生產速度效率以至美觀上都比起
上一個世紀都要進步,但進步既代價就係消耗更多資源,
要用更多化學物去生產食品,試問今時今日有邊件食物
無俾人改良過

今晚忽然周博士上身...

太陽出來了

早年有首廣告歌,當中有句歌詞係"太陽出來了"來比喻件產品如太陽令人提神,
我打從上星期開始就已經無見過太陽伯伯同我say聲hi,今天一早醒來,望見窗外
終於唔使帶多件野,或又者今日預計對鞋會濕到邊個位置

不過話時話,我由唔知邊日開始,我同太陽伯伯say聲hi既時間永遠都係中午時份,
電視機唔係播住中午新聞,就是宣x易,總無機會睇下個電視機字幕會播今日係農
曆七月十幾,又或者開收音機聽林海峰講政治,要數到最近一次早起應該係近半個
月之前,那次要早起是因為要坐船去澳門,結果可以準時8點去到港澳碼頭,但之後
就無日可以早過11點起身

其實我係鍾意早起多過做夜鬼,之但係自從要去英國bid野,結果生活節奏以至時間
上都跟晒英國,正如我寫呢篇文應該係英國時間下午6點,再咁落去都唔係辦法,看來
我真係要學我朋友調校一下生理時鐘,否則遲早出事....

楂車

基本上每次講起楂車呢樣野總係...無野好講

由18歲未生日開始就一直話要考個車牌,考到今時今日
如果好手神應該已經教埋貨櫃車牌,但到今天為止連一
個電單車牌都無,更何況係私家車以至貨van牌

我唔係唔想考,問題係我真係手上連買路票既錢都無,正
宗長期糧尾,學車要錢,考牌租車又要錢,去運輸署出牌都
係錢,結果連一個無見好耐既朋友都話考牌,我,唯有繼續
抬抬手,睇下有無的士大哥載我去目的地...

希望30歲前完成呢個夢想,不過我諗呢個都係夢想...

海關

唔知你有無去外國購物習慣,呢期我日日上ebay bid野,或者去o的網站訂車仔,結果今個月張信用咭月結單成張單除o左交電話同internet係香港野外,其餘通通都係外國網站或者paypal既支出...

講起外國訂野,每次當去到郵局收件總會發覺件郵件俾人打開,一看之下原來係海關check郵件,每次
海關都總會貼張label話你知件郵件我o地check過,你安心去收,應該唔會有壞,真係唔知好嬲定好笑

希望下次收件呢張label可以再出現,起碼我知道我個件郵件應該唔係炸彈,或者毒品

壞

真奇怪,寫o左咁多日,有時試過睇唔到文章,擒晚貼完今天仍然睇唔到,
唔知你睇唔睇到呢篇文?

人會壞,豬有病,西鐵日日壞訊號,就連鰻魚都話有毒,人生在世點都要
面對咁多壞事,唯有抱著平常心去面對...

秘密

做人其實都幾辛苦,當你唔知一件事既時候又要想盡辦法去知,當你知道後但又要keep住唔同人講得,真係知又苦,唔知亂估又係苦

不過話番轉頭呢種唔講得精神自加入呢間公司後更加日日都要用,特別當你聽埋聽埋,八埋八埋唔少料既時候,你就覺得忍得太多令自己唔想同人講野,因為怕
講多錯多,講晒出o黎,繼續玩自閉,最後會因口臭而死,又或者谷得太多就爆死

有料唔怕放,來吧,各位朋友,有乜心事唔怕同我講,我會好似夾萬幫你keep到實一實,最多只係我死唔係你死,幾抵!

PS:今日聽收音機聽到黃偉文講填詞三四事,其中播了<小玩意>呢首歌,諗下諗下Cass都收山咁耐,唔知幾時佢又出番o黎同容祖兒fight唱歌

放煙花

明日開始,日日都有煙花放,不過到時你又唔會想去...

9月12日,你約o左邊個陪你去迪士尼睇煙花?

迷

你最鍾意係乜?
玩具?車?錢,定係歌手?

有時覺得自己玩得太多,玩到自己做緊乜都唔知,
希望你都唔會係咁

又要返工了

枕頭

呢期天氣不太好,時晴時下雨,今天更掛了一號風球

以前打風總會望掛八號,因為可以不需上課,人大了,
加上工作需要,不管一號定十號風球,只要公司一聲
令下,都要繼續工作,風雨不改

望著那灰灰的天,自然想睡多點,但床邊那個枕頭總
是不太適合我,又高又硬,結果昨夜換了一個較細的,
但今天醒來感覺更加辛苦,更令自己遲了起床

看來應該是時候購買新的枕頭...

PS:已經沒找她十天了,不知她近況如何?打從她致電
給我說了一句話後已經沒有找她,是心淡,是我做錯了,
不想再找她,還是自己找借口去逃避她?

心散無藥醫

呢期放完假,諗住一返工應該更集中精神去做野,
但結果係越做越心散,係放假未放完,定係呢期心
事太多,以為用工作去忘記佢,但仲係忘記唔到...

我知我無搵佢好耐,但我嬲自己仲未嬲完,更何況
我都唔識點令佢識笑識開心,都係唯有繼續嬲自己...

死la,仲唔快手做,我怕有天總會出事

世事無常,還是早已預料

要走既終於要走,希望在天上可活得更快樂!

給四婆.

放假

難得放幾日假,心情應該幾輕鬆,不過呢期屋企實在太多事發生,
都係有假放=無假放,唔得,呢個星期六日要放鬆一下,實在有太
多不如應既事要面對

PS:唔好嬲!

救命

有時真係想講句:救命

今日睇報紙有人專登搭頭班迪士尼線,仲要扮主席企mic stand,
再望真o的,原來只係一個私人網頁既主席,真係唔講救命都唔得

返工返得太耐,大假儲o左太多,係時候要放鬆下,唔使成日叫救命

等食飯等到個胃不停叫救命

總之今日既主題就係救命,唔知邊個可以幫我,救我一命!多謝你!

PS:有時o的野唔關我事做乜要XXY我?我只係打份工,有o的野唔
係我可以控制到,我想落名但唔係我話落就落;篇野唔係我做話知
佢老豆買K仔定買女都唔關我事,雖然禍不及妻兒,但唔係我既野
就唔輪到我管,更加唔好三七廿一就媽...救命!

股票

送俾人既野結果無送,就係呢張紙,一張算不值錢既紙
其實我有心想同佢慶祝,但永遠和你想像的很遠很遠

係我想得太多,還是不要再想

PS:賣廣告時間:邊個未去漫畫節好快D去,有朋友做5天檔主

好人

今日聽完<好人>呢首歌,好鍾意,鍾意唔止因為歌詞,
而係唱本身側田歌功一流,真係想知幾時出碟

好人 - 側田
作曲：Rob Lay(On Your Mark)
填詞：林夕 編曲：T.Lo 監製：雷頌德

若談樣子　不會叫好　不算最討好
但我的內在美　不夠味道　哪足以自豪
談為人　當然好　雙手也好抱
無奈獨有伴侶問前路
沒有想陪同鄰家男孩跳舞
唯獨當我師徒

人人親近我　無人爭奪我
無人關懷是誰大平賣親和
平凡像我路過　十個似我　情敵實在太多
人人鼓勵我　無人傾慕我
常常激勵別人盡情熱戀事後遺下我
像毒咒　無人愛我　別嚇我

並無自欺　所有老死　只配作知己
願意跟我細數戀愛挫折　抱住我會死
談完情　拖好手　都將我拋棄
從來沒理會我喜與悲
是那麼平凡仍可以來鬥氣
談情令我心死　由得我死

人人親近我　無人爭奪我
無人關懷是誰大平賣親和
平凡像我路過　十個似我你管不到那麼多
天都不愛我　立心孤立我
平凡的人若提及情份便顯得不配麼
難道我看不到現況正是結果

由得我　無人爭奪我無人關懷是誰大平賣親和
平凡像我路過　十個似我　情敵實在太多
天都不理我　令我想清楚
感情是來自由弱者所寫的悲歌
事實上為什麼不拍到拖　說穿了我不美　信我

生日快樂

生日快樂
一個簡單都人人都識講既字句
但對我就從來唔識講,因為既怕自己面對,又怕面對人

自己都唔細,去過唔少人生日,開心又有,不歡而散都試
過,但為自己搞既就一個都未有

早幾日去一位朋友生日派對,佢今年廿歲,去到除左玩遊
戲就係食野,我結果兩手空空咁去,因為唔知送乜好,送手
鐲人人都送,本來打算送樣幾特別既野俾佢,但最後都無
送到,因為我都唔知點包裝好--你有無聽過人買張花紙包
住張股票,無錯的確係一張股票,有名有地址,仲要有埋有
幾多股既股票,但結果係無送出去仲賣埋,因為張股票唔
值錢,囉去賣分分鐘蝕埋經紀既手續費

算吧,我都祝呢幾日生日既朋友生日快樂先